ജാതിമതങ്ങളുടെ സങ്കുചിത ലോകത്ത് പിറന്നു വീഴുക എന്നത് കേവലം ജന്മത്തിന്റെ ആകാസ്മികത. അത് ഒരു വ്യക്തിയുടെയും സ്വന്തമായ സ്വതന്ത്രമായ തെരെഞ്ഞെടുപ്പ് അല്ല. പിറവിനല്‍കിയ ജാതിമത മുദ്രകളെ അന്ധമായി ജീവിതകാലം മുഴുവന്‍ ആഘോഷപൂര്‍വ്വം അനുകരിക്കുക എന്നതാണ് അസംബന്ധജടിലമായ കാര്യം. അന്വേഷണത്തിന്റെയും അറിവിന്റെയും ചിന്തയുടെയും വെളിച്ചത്തില്‍ തള്ളേണ്ടതിനെ തള്ളുകയും കൊള്ളേണ്ടതിനെ കൊള്ളൂകയും ചെയ്യുമ്പോള്‍ ആണ് നാം ആത്മബോധത്തിലെക്ക് ഉയരുന്നത്.
പൂര്‍വാശ്രമത്തിലെ അടയാളങ്ങളും ആചാരങ്ങളും അനുഷ്ടാനങ്ങളും യാന്ത്രികമായി പുനരാവിഷ്കരിക്കുകയും പൂര്‍വ്വസ്മൃതികള്‍ അയവിറക്കുകയും ചെയ്യുന്നവരാണ് ഇന്നത്തെ കാലത്ത് ജാതിമതങ്ങളുടെ പേരില്‍ വല്ലാതെ അഭിമാനിക്കുകയും അഹങ്കരിക്കുകയും മേനി നടിക്കുകയും ചെയ്യുന്ന ജനവിഭാഗങ്ങള്‍ . കാലികപ്രസക്തിയും പ്രയോഗക്ഷമതയും നഷ്ടപെട്ട ബിംബങ്ങളും ആശയങ്ങളും ആണ് ഇവര്‍ പേറിനടക്കുന്നത് .
ഇന്നത്തെ സാമൂഹികസാമ്പത്തിക വ്യവസ്ഥിതിയില്‍ സ്വന്തം ജീവിതവിജയത്തിനു വേണ്ടി, കാലപ്രസക്തമായ ആധുനികതയുടെ എല്ലാ ചിട്ടവട്ടങ്ങളും ഉപാധികളും രീതികളും മൂല്യങ്ങളും സ്വകാര്യജീവിതത്തിന്റെ അകത്തളങ്ങളില്‍ ഇവര്‍ സ്വീകരിക്കുന്നു എന്നത് ഇവരുടെ കാപട്യത്തിന്റെ സാക്ഷ്യപത്രങ്ങള്‍ . അന്യ ജാതിമതങ്ങളോടുള്ള വിദ്വേഷത്തിന്റെയും അകല്‍ച്ചയുടെയും സങ്കുചിതലോകത്ത് സ്വന്തം ബോധമണ്ഡലത്തെ തളച്ചിട്ടിരിക്കുന്ന ഇവര്‍ക്ക്‌ മാനവസമൂഹത്തിന്റെ പൊതുവായ ഉണര്‍വിനും മോചനത്തിനും വേണ്ടി നിലകൊള്ളുക അസാധ്യം.
No comments:
Post a Comment