അറിവിന്റെ വെളിച്ചത്തില്‍ എല്ലാ സമസ്യകളെയും അവസ്ഥകളെയും മനസ്സിലാക്കുവാന്‍ ശ്രമിക്കുന്നത് , അന്ധമായ വിശ്വാസത്തിന്റെ ബലത്തില്‍ സമസ്ത കാര്യങ്ങളും വിലയിരുത്തുന്നതിനേക്കാള്‍ മഹത്തരം ആണ്. ബോധ്യത്തിന്റെ അടിസ്ഥാനത്തില്‍ ആയിരിക്കണം നമ്മുടെ ഏതു നിഷേധവും , സ്വീകരണവും.
പ്രകൃതിയും മനുഷ്യനും തമ്മിലുള്ള - മനുഷ്യനും മനുഷ്യനും തമ്മിലുള്ള സന്തുലിതാവസ്ഥക്ക് വേണ്ടി പ്രായോഗികമായി ഇടപെടുന്ന ശാസ്ത്രീയ ദര്‍ശനമാണ് , സ്ഥലകാല ഭേദമില്ലാത്തതും പ്രളയകാലം വരെ മാറ്റം ഇല്ലാത്തതും അപ്രായോഗികവുമായ ദര്‍ശനത്തെക്കാളും മനുഷ്യ മോചനത്തിന് ഉതകുക.
മനുഷ്യന്റെ സാമൂഹിക പ്രതിബദ്ധതയും , അന്തസ്സും , സ്വതന്ത്ര ചിന്തയും നിലനില്‍ക്കുന്ന സമാധാനവും സമതയും കൂട്ടായ്മയും ഉള്ള ഒരു ലോകം ആണ് നമുക്ക് വേണ്ടത് . അത് നേടിയെടുക്കുവാന്‍ എല്ലാ സങ്കുചിത പ്രതിലോമ പിന്തിരിപ്പന്‍ ആശയങ്ങളോടും പ്രസ്ഥാനങ്ങളോടും സന്ധിയില്ലാത്ത സമരം അനിവാര്യമാണ്.
ചരിത്രത്തിന്റെ ഓരോ ദശാസന്ധികളിലും ജീര്‍ണ്ണിച്ച ദര്‍ശനങ്ങളോട് കലഹിച്ചു കൊണ്ടാണ് മനുഷ്യന്‍ സംസ്കാരത്തിന്റെ ഓരോ പടവുകളും താണ്ടിയത് . തമസ്സിന്റെ ഉപാസകരാകുന്നതിനു പകരം വെളിച്ചത്തിന്റെ ദീപശിഖ ഏന്തുന്നവന്‍ ആവുക എന്നതായിരിക്കട്ടെ നമ്മുടെ എല്ലാവരുടെയും ജീവിത സമീപനം.
No comments:
Post a Comment